İsxak Hersoq: “Azərbaycan İlham Əliyevin rəhbərliyi ilə sabitlik nümunəsinə çevrilib”

Bakıda keçirilən Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) 7-ci Zirvə Toplantısında çıxış edən İsrail Prezidenti İsxak Hersoq Azərbaycanın regional rolu və liderliyindən bəhs edib.

hadiseler.info “Report”a istinadən xəbər verir ki, İsrail Prezidenti Azərbaycanın Prezident İlham Əliyevin rəhbərliyi altında böyük uğurlar əldə etdiyini vurğulayıb:

“Azərbaycan Prezident İlham Əliyevin rəhbərliyi altında sabitlik nümunəsinə çevrilərək iqtisadi artım nümayiş etdirir və region ölkələri ilə əlaqələrini möhkəmləndirir”.

“AQEM əməkdaşlıq və tərəfdaşlıq vahəsi olaraq qalır”

İsxak Hersoq Azərbaycanın AQEM-ə sədrlik dövründə təşkilatın fəaliyyətinə yeni təkan verdiyini diqqətə çatdırıb:

“Biz burada, Bakıda dünya birliyində fikir ayrılıqlarının dərinləşdiyi, çoxtərəfli formatlara etimadın azaldığı bir vaxtda toplaşmışıq. Bu ikiüzlülük dalğasına baxmayaraq, AQEM əməkdaşlıq və tərəfdaşlıq vahəsi olaraq qalır”.

İsrail dövlət başçısı ölkəsinin təşkilat yarandığı ilk vaxtlardan etibarən fəal iştirak etdiyini bildirib. Sammitin Azərbaycanda keçirilməsini rəmzi məna daşıyan hadisə kimi dəyərləndirən Hersoq ölkəmizi regional tərəfdaşlıq, tolerantlıq və etimad tədbirlərinin möhkəmləndirilməsi nümunəsi kimi səciyyələndirib.

O, həmçinin əlavə edib ki, qlobal gərginliyin artdığı bir şəraitdə Azərbaycan təşkilatın diqqətini konstruktiv dialoqa, uzunmüddətli tərəfdaşlığa və ortaq məxrəclərin tapılmasına yönəldib.