İtaliyada qasırğa və güclü dolu: 43 nəfər xəsarət aldı

İtaliyanın şimalında yerləşən Kremona şəhərində baş verən güclü qasırğa və dolu ciddi fəsadlar törədib.

hadiseler.info “ANSA” agentliyinə istinadən xəbər verir ki, təbii fəlakət nəticəsində 43 nəfər müxtəlif dərəcəli xəsarətlər alıb, o cümlədən sümük sınıqları olanlar var.

Güclü dolu təxminən 10 min avtomobilə ziyan vurub, yüzlərlə ağacı kökündən qoparıb. Təbii fəlakət şəhərin tarihi irsinə də ciddi zərbə vurub: Katedral və daha 10 kilsə zədələnib, şəhərin ən qədim saraylarından birində yerləşən bələdiyyə binasının qülləsinin bir hissəsi uçub. Hadisədən sonra səkkiz ailə təhlükəsizlik məqsədilə təxliyə olunub. Kremona şəhər administrasiyası təcili tədbirlərin müəyyənləşdirilməsi üçün fövqəladə iclas keçirir.

Qeyd edək ki, hazırda İtaliyada kəskin hava kontrastı hökm sürür. Şimalda fırtınalar tüğyan etdiyi bir vaxtda, ölkənin cənubu norma göstəricilərindən 12 dərəcə yüksək Afrika istiləri ilə üz-üzədir.