Lənkəranda mikroavtobus yük maşınına çırpıldı- 2 ölü

Ələt-Astara magistral yolunun Lənkəran rayonu ərazisindən keçən 154-cü kilometrliyində iki nəfərin ölümü və xəsarətlə nəticələnən ağır yol-nəqliyyat hadisəsi baş verib.

hadiseler.info xəbər verir ki, saat 21:20 radələrində 99-SU-026 dövlət qeydiyyat nişanlı “Mercedes Vito” markalı mikroavtobus iritonnajlı “Dong Feng” markalı yük avtomobilinin arxasına çırpılıb. Zərbənin gücündən mikroavtobus deformasiyaya uğrayıb və sərnişinlər nəqliyyat vasitəsində sıxılı vəziyyətdə qalıblar.

Hadisə yerinə dərhal FHN-in Cənub Regional Mərkəzinin xilasediciləri və polis əməkdaşları cəlb olunub. Xüsusi xilasetmə vasitələrinin köməyi ilə avtomobildə sıxılıb qalan 1961-ci il təvəllüdlü Ağayeva Gülnaz Yusub qızı və 1997-ci il təvəllüdlü Nəsirov Zaman Tərlan oğlunun meyitləri çıxarılaraq aidiyyəti üzrə təhvil verilib. Qəza nəticəsində daha 1 nəfər xəsarət alıb.

DİN-in Mətbuat Xidmətinin regional qrupundan bildirilib ki, sürücülərdən yol və hava şəraitini, nəqliyyat vasitəsinin xüsusiyyətlərini nəzərə alaraq müəyyən edilmiş sürət həddinə ciddi riayət etmələri, təhlükəsiz ara məsafəsi saxlamaları xahiş olunur.

Faktla bağlı müvafiq qurumlar tərəfindən araşdırma aparılır.