Leyla Əliyeva Romada film təqdimatında – Fotolar

Sentyabrın 28-də İtaliyanın paytaxtı Romada Azərbaycanın zəngin multikultural dəyərlərini əks etdirən “Harmoniya” sənədli filminin təqdimat mərasimi keçirilib.

hadiseler.info AZƏRTAC-a istinadən xəbər verir ki, Heydər Əliyev Fondunun vitse-prezidenti Leyla Əliyeva tədbirdə iştirak edib.

Dini Qurumlarla İş üzrə Dövlət Komitəsi, Mənəvi Dəyərlərin Təbliği Fondu və Bakı Media Mərkəzinin birgə tərəfdaşlığı ilə ərsəyə gələn filmin baş prodüseri Bakı Media Mərkəzinin rəhbəri Arzu Əliyevadır.

Tədbirdə Azərbaycan nümayəndə heyəti ilə yanaşı, Müqəddəs Taxt-Tacın dövlət rəsmiləri, diplomatik korpusun, dini icmaların təmsilçiləri və din xadimləri iştirak ediblər. Filmin nümayişindən əvvəl ölkəmizin dini-mədəni irsini təcəssüm etdirən fotostend təqdim olunub.

Təqdimatda çıxış edən Azərbaycanın Müqəddəs Taxt-Tacdakı səfiri İlqar Muxtarov, Müqəddəs Taxt-Tacın Dinlərarası Dialoq üzrə Dikasteriyasının nümayəndəsi Ata Loran Basanez (prefekt kardinal Corc Ceykob Kuvakadın müraciətini oxuyub) və Dini Qurumlarla İş üzrə Dövlət Komitəsinin sədri Ramin Məmmədov ekran əsərinin fərqli inanclara mənsub üç gənc qadının dostluğu üzərindən Azərbaycandakı dinc birgəyaşayış modelini və mənəvi dəyərləri dünyaya çatdırdığını vurğulayıblar. Ekran əsərinin beynəlxalq festivallarda da nümayişi nəzərdə tutulur.