Məktəbli formalarının qiymətləri bəlli oldu — BTE-dən endirim açıqlaması

Yeni tədris ilinin başlamasına təxminən bir ay qalmış müxtəlif satış şəbəkələrində məktəbli formalarının satışına başlanılıb.

hadiseler.info Report.az-a istinadən xəbər verir ki, aparılan müşahidələr ticarət məkanlarında məktəbli geyimlərinin qiymətlərinin müxtəlif olduğunu göstərir.

Belə ki, mağazaların birində qısaqol köynəklər 23-27 manat, uzunqol köynəklər 25-27 manat, klassik şalvarlar 20-28 manat, ipli şalvarlar 20-30-35 manat, jaketlər 25-35 manat, ətəklər isə 25-35 manat aralığında satışa çıxarılıb. Geyimlərin üzərinə təhsil müəssisəsinin logosunun vurulması isə 1,5 manat təşkil edir. Şəbəkə nümayəndələri Türkiyə istehsalı olan bu geyimlərin tam pambıq tərkibli olduğunu bildirirlər.

Başqa bir ticarət mərkəzində isə köynəklər 15 manatdan, ətəklər 13 manatdan, şalvarlar 20 manatdan, jaketlər isə 23 manatdan başlayan qiymətlərlə təklif edilir.

Bakı Tikiş Evi (BTE) Satış şöbəsinin müdiri Etibar Əzimov isə qiymətlərlə bağlı açıqlamasında bildirib ki, istehsal etdikləri məktəbli formaları keçən il olduğu kimi bu il də endirimli qiymətlərlə satışa çıxarılıb:

“Əvvəllər 20 manata satılan şalvar və ətəklərin qiyməti indi 15 manata endirilib. Jaketlər 30 manat əvəzinə 22 manata, polo köynəklər isə 12-14 manata təklif olunur”.

Rəsmi şəxs geyimlərin Türkiyə, Belarus və Özbəkistandan gətirilən keyfiyyətli parçalardan tikildiyini vurğulayıb. BTE nümayəndəsi satışın ilboyu davam etdiyini xatırladaraq əlavə edib:

“Ölkə üzrə fəaliyyət göstərən 8 satış mərkəzində hər gün səhər saat 09.00-dan axşam 18:00-a kimi valideynlər istədikləri ölmüdə forma əldə edə bilərlər”.

E.Əzimov dərs ilinə az vaxt qaldığını nəzərə alaraq valideynlərə növbələrin və sıxlığın yaranmaması üçün alış-verişi son günlərə saxlamamağı tövsiyə edib:

“Vaxt az qaldığından satış məntəqələrində sıxlıq və növbələr yarana bilər. Bu səbəbdən, valideynlərin məktəbli formalarını əvvəlcədən alması həm rahat seçim imkanlarını genişləndirir, həm də növbədə gözləmədən alış-veriş etməyə şərait yaradır”.