Mərdəkanda avtobus və “Lada” toqquşdu – VİDEO

Bakının Xəzər rayonunda xilasedicilərin müdaxiləsini tələb edən ağır yol-nəqliyyat hadisəsi baş verib.

hadiseler.info xəbər verir ki, bu barədə Fövqəladə Hallar Nazirliyi (FHN) məlumat yayıb.

Hadisə Mərdəkan qəsəbəsi ərazisində qeydə alınıb. “Daewoo” markalı avtobus və “Lada Granta” markalı minik avtomobilinin iştirakı ilə baş verən qəzada “Lada Granta” idarəetməni itirərək ağaca çırpılıb. Zərbənin gücündən deformasiyaya uğrayan avtomobilin sürücüsü, 1985-ci il təvəllüdlü Qədimov Elçin Qədim oğlu maşının içərisində sıxılı vəziyyətdə qalıb.

Məlumatla əlaqədar dərhal FHN-in Xüsusi Riskli Xilasetmə Xidmətinin xilasediciləri əraziyə cəlb olunublar. Xilasedicilər xüsusi vasitələrin köməyi ilə E.Qədimovu xilas edərək təcili tibbi yardım briqadasına təhvil veriblər.

Faktla bağlı müvafiq qurumlar tərəfindən araşdırma aparılır.