Makron Fransada etiraz aksiyalarına qadağa qoyulacağını bəyan etdi

Fransa Prezidenti Emmanuel Makron yaxın günlərdə həmkarlar ittifaqları tərəfindən təşkil olunmayan bütün etiraz aksiyalarına yerli hakimiyyət orqanları tərəfindən qadağa qoyulacağını açıqlayıb.

hadiseler.info Yelisey sarayının “X” sosial şəbəkə hesabına istinadən xəbər verir ki, dövlət başçısı qarşıdakı nümayişlərlə bağlı Nazirlər Kabineti üzvlərinin iştirakı ilə keçirilən iclasdan sonra müvafiq bəyanatla çıxış edib. Emmanuel Makron hazırda etirazların zamanı olmadığını və ölkədə yenidən sakitliyin bərqərar edilməsinin vacibliyini vurğulayıb. O bildirib ki, söhbət həmkarlar ittifaqı təşkilatlarından gedirsə, prefektlər onlara alternetiv marşrutlar təqdim edəcəklər, lakin həmkarlar ittifaqlarına aid olmayan bütün aksiyalar istisnasız olaraq qadağan ediləcək.

Fransa prezidenti oktyabrın 17-də ölkə daxilində baş verən iğtişaşlara görə solçu radikal qrupları günahlandıraraq, onların əsas məqsədinin ölkəni darmadağın etmək olduğunu qeyd edib. Xatırladaq ki, oktyabrın 17-də Paris də daxil olmaqla Fransanın müxtəlif şəhərlərində yanacaq qiymətlərinin artmasına və alıcılıq qabiliyyətinin düşməsinə qarşı kütləvi etirazlar baş tutub. Təşkilatçılar yürüşlərdə 800 min, Daxili İşlər Nazirliyi isə 550 min nəfərin iştirak etdiyini bildirib. Bir sıra bölgələrdə aksiyaçılarla polis arasında şiddətli toqquşmalar qeydə alınıb.