Narkotik istifadə edən və sürücülük hüququ olmayan şəxs sükan arxasında həbs olundu

Bakının Xətai rayonunda yol polisi əməkdaşları tərəfindən keçirilən profilaktik tədbirlər zamanı qaydaları kütləvi şəkildə pozan sürücü saxlanılıb.

hadiseler.info xəbər verir ki, Xətai Rayon Polis İdarəsinin Dövlət Yol Polisi Şöbəsinin əməkdaşları “Chevrolet” markalı avtomobili dövlət qeydiyyat nişanı olmadan, konstruksiya dəyişikliyi ilə və şüşələrinə normativlərə uyğun olmayan plyonka çəkməklə idarə edən 44 yaşlı Mustafa Əfəndiyevi saxlayıblar.

Daxili İşlər Nazirliyindən (DİN) verilən məlumata görə, yoxlama zamanı M.Əfəndiyevin sürücülük hüququnun olmadığı müəyyən edilib. Şübhəli hərəkətlərinə görə tibbi müayinədən keçirilən sürücünün narkotik vasitə qəbul etdiyi də subuta yetirilib.

Sürücü barəsində İnzibati Xətalar Məcəlləsinin müvafiq maddələri ilə protokol tərtib olunaraq məhkəməyə göndərilib. Məhkəmənin qərarı ilə M.Əfəndiyev 15 gün müddətinə inzibati qaydada həbs edilib.