Ödənişli yolunda ağır qəza: Sürücü həlak oldu

Bakı-Quba ödənişli avtomobil yolunda ölümlə nəticələnən ağır yol-nəqliyyat hadisəsi baş verib.

hadiseler.info xəbər verir ki, Fövqəladə Hallar Nazirliyinin (FHN) “112” qaynar telefon xəttinə qəza və vətəndaşın avtomobildə sıxılı vəziyyətdə qalması barədə məlumat daxil olub. Məlumatla əlaqədar hadisə yerinə dərhal FHN-in Sumqayıt Regional Mərkəzinin xilasediciləri cəlb edilib.

Hadisə yerində əməliyyat şəraiti qiymətləndirilərkən müəyyən olunub ki, “Mercedes” markalı özüboşaldan yük avtomobili sürücünün idarəetməni itirməsi nəticəsində aşıb.

Xilasedicilər xüsusi kəsici və xilasetmə vasitələrindən istifadə edərək deformasiyaya uğramış nəqliyyat vasitəsində sıxılı qalan 1995-ci il təvəllüdlü sürücü Qasımov Turqay Əhməd oğlunun meyitini çıxarıb və aidiyyəti üzrə təhvil veriblər.

Faktla bağlı müvafiq hüquq-mühafizə qurumları tərəfindən araşdırma aparılır.