Daşkənddə Nizami Gəncəvi adına Universitetin binası açılacaq

Özbəkistanda Nizami Gəncəvi adına Milli Pedaqoji Universitetin yeni binası açılacaq və “Yeni Daşkənd” layihəsi çərçivəsində Azərbaycan Parkının tikintisinə start veriləcək.

hadiseler.info xəbər verir ki, bu barədə Özbəkistan Prezidenti Şavkat Mirziyoyev Azərbaycan-Özbəkistan Ali Dövlətlərarası Şuranın 3-cü iclasında məlumat verib.

Özbəkistan dövlət başçısı mədəni-mənəvi irsin qorunmasının vacibliyini vurğulayaraq yeni təşəbbüsləri diqqətə çatdırıb:

“Müttəfiqliyimiz iki qardaş xalqın çoxəsrlik ümumi tarixinə və mədəni dəyərlərinin yaxınlığına əsaslanır. Bizim borcumuz bu zəngin irsi diqqətlə qorumaq və daha da zənginləşdirməkdir. Bu gün birlikdə Nizami Gəncəvi adına Milli Pedaqoji Universitetin yeni binasını açacaq və Yeni Daşkənddə Azərbaycan parkının tikintisinə start verəcəyik.”

Şavkat Mirziyoyev həmçinin iki xalqın tarixi yaxınlığını əks etdirən yeni kino layihəsinin anonsunu verib:

“Xalqlarımızın daha da yaxınlaşması məqsədilə İlham Heydaroviçlə dar tərkibdə müzakirə etdik və “Nizami Gəncəvi ilə Əlişir Nəvai arasında ədəbi körpü” adlı birgə filmin çəkilməsini təklif edirik. Bu, xalqlarımızın, xüsusilə də gənclərin yaxınlaşması üçün çox yaxşı nümunə olacaq. Bu ilin payızında Azərbaycanda iki ölkənin aparıcı ali məktəblərinin rektorlarının ikinci forumunun keçirilməsini də dəstəkləyirik.”