Papa XIV Leo xəstəxanadan BURAXILDI

Katolik dünyasının ruhani lideri Papa XIV Leo ağciyərindəki xərçəng şişinin xaric edilməsi əməliyyatından dörd gün sonra xəstəxanadan evə buraxılıb.

hadiseler.info xəbər verir ki, bu barədə “Reuters” agentliyi məlumat yayıb.

Məlumata görə, 71 yaşlı Papa İtaliyanın poytaxtı Romadakı Gemelli Xəstəxanasında sağ ağciyərinin aşağı payının kəsilib götürülməsi əməliyyatını uğurla keçirib. Əməliyyatdan sonrakı müayinələrin nəticələrini qənaətbəxş hesab edən həkimlər onun xəstəxanadan çıxmasına icazə veriblər.

Qəbullar ləğv edildi, xarici səfərlər sual altındadır

Katolik kilsəsinin rəhbərinin rəsmi qəbulları oktyabrın 20-dək ləğv edilib. Papanın noyabrın 6-dan 17-dək Uruqvay, Argentina və Peruya səfərləri planlaşdırılsa da, bu səfərlərin reallaşması həkimlərin yekun tövsiyələrindən asılı olacaq.

Vatikan Dövlət Katibi kardinal Petro Parolin Papanın səhhətinin bərpası prosesinə uyğun olaraq iş qrafikində dəyişikliklərin edilə biləcəyini bəyan edib. Şişin dəqiq ölçüsü və xəstəliyin limfa düyünlərinə yayılıb-yayılmadığına dair ətraflı tibbi rəy hüceyrə analizlərindən sonra açıqlanacaq.