Fransada etirazçılar bələdiyyə binasını dağıdıblar

Fransada yanacaq bahalaşması və alıcılıq qabiliyyətinin düşməsinə qarşı başlayan kütləvi etirazlar daha da kəskinləşib.

hadiseler.info xəbər verir ki, ölkənin Marsel şəhərində nümayişçilər bələdiyyə binasına basqın ediblər.

“La Provence” qəzetinin məlumatına görə, aqressiv etirazçılar meriyanın giriş qapısını sındıraraq daxil olub, binanın divarlarını rəngləyərək daxili infrastruktura ciddi ziyan vurublar.

BFMTV telekanalının yayımladığı görüntülərdən aydın olur ki, insident zamanı Fransa Respublikasının əsas milli simvollarından biri sayılan Mariannanın büstü də sındırılaraq məhv edilib. Hadisədən dərhal sonra xüsusi polis bölmələri meriya binasını tam mühasirəyə alıb və əraziyə qalxanlı təhlükəsizlik qüvvələri yerləşdirilib.

Məlumata görə, meriyaya hücum etməzdən bir qədər əvvəl həmin aqressiv qrup şəhər mərkəzində yerləşən bələdiyyə polis bölməsini talan edib və ətrafdakı bir neçə ticarət obyektinə ziyan vurub.

Marseldəki iğtişaşlar ölkə miqyasında keçirilən kütləvi tətillər fonunda baş verir. Oktyabrın 17-də Paris başda olmaqla Fransa üzrə ümumilikdə 190 minə yaxın (o cümlədən paytaxtda 40 minə yaxın) insanın küçələrə çıxdığı bildirilir. Etiraz aksiyalarına taksi sürücüləri, tibb və tikinti sektoru çalışanları, həmkarlar ittifaqları, tələbələr və “Sarı jiletlilər” hərəkatının üzvləri qoşulub.

Aksiyaların əsas tələbi yanacaq qiymətlərinin endirilməsi və əhalinin sosial rifahının yaxşılaşdırılmasıdır.