Pezeşkian: “Azərbaycanla münasibətləri yeni səviyyəyə çıxaracağıq”

İran İslam Respublikası ilə Azərbaycan arasında ikitərəfli əlaqələrin daha da inkişaf etdirilməsi üçün münasib şərait yaranıb.

hadiseler.info xəbər verir ki, bu barədə İran Prezidenti Məsud Pezeşkian IRIB telekanalına verdiyi müsahibəsində bildirib.

Dövlət başçısı qeyd edib ki, hazırda Azərbaycan, Səudiyyə Ərəbistanı, Türkiyə, Birləşmiş Ərəb Əmirlikləri, Qətər, Oman, Misir və Türkmənistanla münasibətləri yeni müstəviyə qaldırmaq və vacib sazişlər imzalamaq üçün bütün imkanlar mövcuddur. Pezeşkian regional məsələlərdə güc dilinin faydasız olduğunu vurğulayaraq, dialoq və mehriban qonşuluq siyasətinə üstünlük verdiklərini diqqətə çatdırıb.

İran lideri ABŞ ilə münasibətlərə və Hörmüz boğazındakı vəziyyətə də toxunub. O bəyan edib ki, Vaşinqton dəniz blokadasını dayandıracağı, sanksiyaları ləğv edəcəyi və dondurulmuş vəsaitləri azad edəcəyi təqdirdə Tehran boğazı gəmiçilik üçün açmağa hazırdır. Pezeşkian əlavə edib ki, regional sabitliyin bərpası üçün İsrailin Livana hücumları dayandırılmalıdır.