Pezeşkian BMT-nin kürsüsünə Xameneinin şəkli ilə çıxdı

İran Prezidenti Məsud Pezeşkian BMT Baş Assambleyasının kürsüsündən ölkəsinin heç vaxt Birləşmiş Ştatlar qarşısında baş əyməyəcəyini bəyan edib.

hadiseler.info xəbər verir ki, İran lideri rəsmi çıxışına müharibənin ilk günlərində ölkədəki ibtidai məktəblərdən birinə endirilən zərbəni xatırlatmaqla başlayıb:

“Biz terrorizmin qurbanı olmuşuq. İran heç bir ölkənin Hörmüz boğazından öz təcavüzkar planlarını həyata keçirmək üçün istifadə etməsinə icazə verməyəcək. Həmçinin Tehran nüvə texnologiyalarına hərbi təhdid üçün deyil, yalnız inkişaf və tərəqqi naminə can atır”.

Məlumat üçün bildirək ki, İran Prezidenti çıxışı zamanı İranın sabiq Ali Lideri Seyid Əli Xameneinin fotosunu da nümayış etdirib. Səhər iclasının beşinci natiqi olan Pezeşkianın çıxışı başlayan kimi BMT zalında əyləşən yeganə ABŞ nümayəndəsi ayağa qalxaraq məkanı tərk edib.

Qeyd edək ki, bu çıxışdan bir qədər əvvəl ABŞ Prezidenti Donald Tramp Vaşinqtonun İrana dair “böyük qərar” verməli olduğunu bəyan edərək, Konqresə aralıq seçkilərindən sonra Tehranla ya yekun saziş bağlanmalı, ya da ölkənin “məhv edilməli” olduğunu bildirmişdi. ABŞ Dövlət katibi Marko Rubio da razılaşma əldə olunmayacağı təqdirdə İrana qarşı iqtisadi təzyiqlərin daha da sərtləşdiriləcəyi ilə hədələyib.