Prezident İlham Əliyev: “Biz təkcə qarşılıqlı ticarəti artırmaqla kifayətlənməməliyik”

Azərbaycan və Mərkəzi Asiya dövlət başçılarının 8-ci Məşvərət görüşündə çıxış edən Prezident İlham Əliyev region ölkələri ilə iqtisadi və nəqliyyat əlaqələrinin genişləndirilməsinin vacibliyini bildirib.

hadiseler.info istinadən xəbər verir ki, dövlət başçısı ötən il Azərbaycanın Mərkəzi Asiya ölkələri ilə ticarət dövriyyəsinin 50 faizdən çox artdığını diqqətə çatdırıb. Həmçinin ölkəmizdə Mərkəzi Asiya kapitalı ilə 400-dən çox şirkətin aktiv fəaliyyət göstərdiyini, Qazaxıstan, Özbəkistan və Qırğızıstanla birgə yaradılan investisiya fondlarının hər birinin yüz milyonlarla dollar kapitala malik olduğunu vurğulayıb.

Prezident İlham Əliyev birgə layihələrin icrası, yeni istehsal müəssisələrinin yaradılması və sənaye əməkdaşlığının genişləndirilməsi üçün bu fondlardan fəal tərəfdaşlıq çağırışı edib:

“Biz təkcə qarşılıqlı ticarəti artırmaqla kifayətlənməməliyik, həm də birlikdə investisiya qoymalı, istehsal etməli və xarici bazarlara çıxmalıyıq”.

Çıxışında nəqliyyat sahəsinin strateji rolinə də toxunan dövlət başçısı Xəzər dənizinin hər iki sahilindəki nəqliyyat infrastrukturunun Mərkəzi Asiyanı Azərbaycan vasitəsilə beynəlxalq bazarlarla birləşdirmək baxımından mühüm əhəmiyyət kəsb etdiyini və əsas məqsədin bu marşrutları daha səmərəli və rəqabətədavamlı etmək olduğunu qeyd edib.