Prezident İlham Əliyev “ŞƏT plyus” görüşündə vacib bəyanatlar verib

Azərbaycan Respublikasının Prezidenti İlham Əliyev Bişkekdə keçirilən “ŞƏT plyus” formatındakı geniş tərkibli görüşdə vacib bəyanatlarla çıxış edib.

hadiseler.info xəbər verir ki, dövlət başçısı ilk növbədə Azərbaycan və Qırğızıstan arasında imzalanmış Müttəfiqlik Müqaviləsinin ikitərəfli münasibətləri ən yüksək səviyyəyə qaldırdığını vurğulayıb. Dövlət başçısı Qırğızıstanın sosial-iqtisadi inkişafını, beynəlxalq nüfuzunun artmasını və 2027–2028-ci illər üçün BMT Təhlükəsizlik Şurasının qeyri-daimi üzvlüyünə seçilməsini beynəlxalq dəstəyin aydın göstəricisi kimi dəyərləndirib.

Prezident İlham Əliyev 30 ildən artıq davam edən Azərbaycan–Ermənistan münaqişəsinin başa çatması ilə Cənubi Qafqazın artıq sülh zonasına çevrildiyini bəyan edib. O qeyd edib ki, Azərbaycan Ermənistana neft məhsulları tədarük edir və üçüncü ölkələrin yüklərinin tranzitini təmin edir. Hazırda hər iki ölkə qarşılıqlı ticarətin artırılması və yeni quru nəqliyyat kommunikasiyalarının yaradılması üzərində fəal iş aparır.

Dövlət başçısı vurğulayıb ki, BMT Təhlükəsizlik Şurasının 1993-cü ildə qəbul etdiyi dörd qətnamə 30 il sonra, üç il əvvəl icra olunub və Azərbaycan öz suverenliyini, ərazi bütövlüyünü tam şəkildə müstəqil olaraq bərpa edib.