Prezidentin köməkçisi geri qaytarılan qanundan danışdı

Milli Məclisin payız sessiyasında keçirilən ilk iclasında Prezidentin köməkçisi Şahmar Mövsümov geri qaytarılan və rəqəmsal texnologiyalar sahəsində güzəştləri nəzərdə tutan qanun layihəsindən söz açıb.

hadiseler.info xəbər verir ki, Ş.Mövsümov 2026-cı il iyulun 14-də Milli Məclis tərəfindən qəbul edilmiş 453 nömrəli qanunun Azərbaycan Konstitusiyasının 110-cu maddəsinə uyğun olaraq Prezident tərəfindən parlamentə geri qaytarıldığını xatırladıb.

Prezidentin köməkçisi bildirib ki, keçən müddət ərzində sənəd aidiyyəti dövlət qurumları ilə birlikdə təkrar müzakirə edilərək təkmilləşdirilib. Qanunun yenidən baxılması dövlət dəstəyinin hədəflərini və tətbiq mexanizmlərini daha da dəqiqləşdirib. Layihə rəqəmsal ekosistem üçün vacib olan mütəxəssis, investor, tədqiqat və bazar həlqələrini vahid təşviq yanaşması ilə birləşdirməyi və innovasiyaları yeni məhsul və xidmətlərə çevirməyi hədəfləyir.

Ş.Mövsümov qanunun təkmilləşdirilmiş redaksiyasının İqtisadi siyasət, sənaye və sahibkarlıq komitəsində də dəstəkləndiyini vurğulayaraq millət vəkillərini bu variantı dəstəkləməyə çağırıb.