Qubada iki bələdiyyənin adı dəyişdirildi

“Bələdiyyələrin əraziləri və torpaqları haqqında” Azərbaycan Respublikasının Qanununa Əlavə edilən “Azərbaycan Respublikasında bələdiyyələrin siyahısı”nda mühüm dəyişiklik olunub.

hadiseler.info xəbər verir ki, Prezident İlham Əliyev bununla bağlı müvafiq Qanunu imzalayıb.

Qanuna əsasən, Quba rayonunun iki bələdiyyəsinin və onların əhatə etdiyi yaşayış məntəqələrinin adları yenilənib. Qərara əsasən, Timiryazev-Alekseyevka bələdiyyəsi Bəhrəli-Çinarlı bələdiyyəsi, Vladimirovka bələdiyyəsi isə Elbir bələdiyyəsi adlandırılıb.

Eyni zamanda sözügedən bələdiyyələrin tərkibinə daxil olan eyniadlı ərazi vahidləri də yeni adlarla əvəz edilib. Yenilənmiş inzibati bölgüyə əsasən, Bəhrəli-Çinarlı bələdiyyəsi Bəhrəli, Çinarlı, İqrığ, Qacar Zeyid və Zizik kəndlərini, Elbir bələdiyyəsi isə Ağbil, Aşağı Atuc, Dəlləkli, Elbir, Əlibəyqışlaq, Mirzəməmmədkənd və Susayqışlaq kəndlərini əhatə edəcək.