Rusiyada kimya zavodunda güclü partlayış: 75 nəfər xəsarət alıb

Rusiyanın Amur vilayətində yerləşən Amur Qaz-Kimya Kompleksində dəhşətli partlayış baş verib.

hadiseler.info Rusiya KİV-lərinə istinadən xəbər verir ki, hadisə nəticəsində ən azı 75 nəfər müxtəlif dərəcəli xəsarətlər alıb.

İlkin və qeyri-rəsmi məlumatlara görə, səhər saatlarında baş verən partlayışdan sonra metanol emalı müəssisəsində güclü yanğın başlayıb. Alov qısa müddətdə genişlənərək təxminən 2 min kvadratmetr sahəni əhatə edib.

Ərazidə Fövqəladə Hallar Nazirliyinin yanğınsöndürmə briqadaları və təcili yardım heyətləri işləyir. Qəzanın başvermə səbəblərini müəyyənləşdirmək üçün xüsusi Dövlət Komissiyası yaradılıb.