Şəkidəki dəhşətli “Zipline” faciəsi ilə bağlı CİNAYƏT İŞİ BAŞLANDI

Şəki rayonunda “Şəki yaylası” istirahət mərkəzində iki şəxsin ölümü ilə nəticələnən ağır faciə ilə bağlı rəsmi istintaq başladılıb.  

hadiseler.info xəbər verir ki, bu barədə Baş Prokurorluğun Mətbuat xidməti məlumat yayıb.

İlkin araşdırma zamanı məlum olub ki, sentyabrın 8-də 1999-cu il təvəllüdlü Ucal Asif oğlu Bayramov və 1995-ci il təvəllüdlü Coşqun Ceyhun oğlu Məmmədzadə “Zipline” əyləncəsindən istifadə edərkən kanat sisteminin bərkidildiyi metal konstruksiyada deformasiya baş verib. Nəticədə əsas mexaniki qurğu kanatdan çıxıb, əlavə təhlükəsizlik avadanlığı zədələnib və hər iki şəxs hündürlükdən yerə düşərək hadisə yerində həlak olub.  

Faktla bağlı Şəki Rayon Prokurorluğunda Cinayət Məcəlləsinin 314.3-cü (iki şəxsin ölümünə səbəb olan səhlənkarlıq) maddəsi ilə cinayət işi açılıb. Hadisə yerinə baxış keçirilib, müvafiq ekspertizalar təyin olunub və “Zipline” qurğularının təhlükəsizlik tələblərinə uyğunluğu istiqamətində istintaq davam etdirilir.