Səudiyyə Ərəbistanı XİN: “Şərq-Qərb” neft kəməri İraqdan atılan PUA-larla hücuma məruz qalıb

Səudiyyə Ərəbistanının “Şərq-Qərb” neft kəməri İraq ərazisindən buraxılan pilotsuz uçuş aparatları (PUA) tərəfindən hədəf alınıb.

hadiseler.info xəbər verir ki, bu barədə Səudiyyə Ərəbistanının Xarici İşlər Nazirliyi rəsmi bəyanat yayıb. Hücum nəticəsində ölən və yaralananların olduğu bildirilir.

Nazirliyin bəyanatında qeyd olunub ki, Krallıq İraqın Baş naziri Əli əz-Zeydinin xahişini nəzərə alaraq və bölgədə sabitliyi dəstəkləmək məqsədilə bu silahlı təxribata cavab verməmək qərarı verib. Buna baxmayaraq, rəsmi Ər-Riyad öz suverenliyini, təhlükəsizliyini və iqtisadi obyektlərini qorumaq üçün lazımi addımları atmaq hüququnu saxlayır.

Əlavə edilib ki, hücumdan sonra təhlükəsizlik tədbiri olaraq Mədinə və Ər-Riyad yaxınlığından keçən neft kəmərinin müəyyən hissələrində fəaliyyət müvəqqəti dayandırılıb. Dronların İranın dəstəklədiyi İraq şiə qruplaşmaları tərəfindən buraxıldığı ehtimal olunur. İraq hökuməti isə hücumu pisləyərək təqsirkarların müəyyən olunması üçün təcili araşdırmalara başlayıb.