Saatlıda ağır yol qəzası: 5 yaşlı uşaq öldü

Saatlı rayonunda ölümlə nəticələnən ağır yol-nəqliyyat hadisəsinin bəzi təfərrüatları bəlli olub.

hadiseler.info “APA”ya istinadən xəbər verir ki, hadisə Hacıqabul-Bəhrəmtəpə-Mincivan avtomobil yolunun Saatlı şəhəri ərazisindən keçən hissəsində qeydə alınıb.

2003-cü il təvəllüdlü Rəhman Möhsüm oğlu Məmmədov “Mercedes” markalı avtomobil ilə Bəhrəmtəpə istiqamətində hərəkətdə olarkən idarəetməni itirib. Nəticədə nəqliyyat vasitəsi yolun sol tərəfində yerləşən işıq dirəyinə, daha sonra isə istirahət parkının ətrafına quraşdırılmış dəmir və beton materialdan olan hasara çırpılıb.

Qəza nəticəsində avtomobildə olan sərnişin Könül Mirzağa qızı Məmmədova müxtəlif bədən xəsarətləri alaraq Saatlı Rayon Mərkəzi Xəstəxanasına yerləşdirilib. Digər sərnişin – 5 yaşlı Bahar Möhsüm qızı Məmmədova isə aldığı ağır xəsarətlərdən xəstəxanada həyatını itirib.

Faktla bağlı cinayət işi başlanılıb, hüquq-mühafizə orqanları tərəfindən araşdırma aparılır.