Anasının gözləri qarşısında maşın vurub öldürdü-VİDEO

Salyan rayonunda ölümlə nəticələnən ağır yol-nəqliyyat hadisəsi baş verib.

hadiseler.info xəbər verir ki, hadisə avqustun 21-də rayonun Qarabağlı kəndində qeydə alınıb. “Mercedes” markalı avtomobil yolu keçmək istəyən 32 yaşlı piyada Sahil Əsgərlini vurub. Ağır yaralanan şəxs xəstəxanaya çatdırılsa da, həkimlərin səyinə baxmayaraq orada dünyasını dəyişib.

Sosial şəbəkələrdə hadisə anının dəhşətli görüntüləri yayılıb. Kadrlar göstərir ki, S.Əsgərli anası ilə birlikdə yolu keçməyə çalışıb. Bu zaman o, yaxınlaşan nəqliyyat vasitəsinin sürətini düzgün qiymətləndirməyərək anidən yolun hərəkət hissəsinə qaçıb və avtomobilin şiddətli zərbəsinə tuş gəlib. Hadisə bədbəxt gəncin anasının gözləri qarşısında baş verib.

Faktla bağlı hüquq-mühafizə orqanları tərəfindən araşdırma aparılır.