Samuxda qarayara həyəcanı: Kənddə nəzarət postu quruldu — FOTO

Samux rayonunun Alıuşağı kəndində qarayara xəstəliyinin aşkar olunması ilə bağlı təxirəsalınmaz təhlükəsizlik tədbirlərinə başlanılıb.

hadiseler.info xəbər verir ki, kənd ərazisində xüsusi nəzarət postu quraşdırılıb. Nəzarət-buraxılış məntəqəsinin qurulmasına baxmayaraq, nəqliyyat vasitələrinin hərəkəti tam şəkildə açıqdır.

Postda əsas məqsəd kənd ərazisindən ət və süd məhsullarının kənara çıxarılmasına və daşınmasına nəzarət etməkdir. Ərazidə Azərbaycan Qida Təhlükəsizliyi Agentliyinin (AQTA) və Baytarlıq İdarəsinin mütəxəssisləri növbətçilik edir. Yoldan keçən bütün avtomobillər xüsusi məhlullarla dezinfeksiya olunur. Eyni zamanda kənddəki iri fermer təsərrüfatlarında dezbaryerlər təşkil edilib.

Xatırladaq ki, bir gün öncə Abbas Səhət adına Gəncə Birləşmiş Xəstəxanasının yoluxucu xəstəliklər şöbəsinə qarayara infeksiyası şübhəsi ilə 11 nəfər yerləşdirilib. Onların böyük əksəriyyəti Samux rayonunun Alıuşağı kənd sakinləridir.