San-Fransiskoda “Terminator” döyüşü keçirildi — VİDEO

ABŞ-nin San-Fransisko şəhərində elmi fantastika filmlərini xatırladan qeyri-adi şou matçı təşkil olunub.

hadiseler.info xəbər verir ki, sosial media fenomeni Frenki LaPenna xüsusi nümayiş döyüşündə təxminən 1,8 metr hündürlüyündə olan humanoid robotla qəfəsdə üz-üzə gəlib.

Robot və əyləncə şirkəti “REK” (“Robot Entertainment Kombat”) tərəfindən təşkil olunan qarşılaşma “ilk İnsan-Terminator robot döyüşü” kimi təqdim olunub.

Şouda “EngineAI T800” model humanoid robotundan istifadə edilib. Görünüşcə robotun müstəqil döyüşdüyü təəssüratı yaransa da, o, əslində virtual reallıq avadanlığı və pult vasitəsilə insan operator tərəfindən idarə olunub. Operator robotun hərəkətlərini yönəldib, cihazın daxili sistemləri isə tarazlığı təmin edib.

Döyüş zamanı robot LaPennaya güclü zərbələr endirib və bir təpik nəticəsində fenomen qəfəsin üzərindən aşıb. Qarşılaşmanın nəticəsi ilə bağlı ziddiyyətli məlumatlar var: bəzi mənbələr robotun nokautla qalib gəldiyini, təşkilatçı “REK” şirkəti isə LaPennanın mübarizəyə davam edərək qalib gəldiyini bildirib.

Şirkət bu tür tədbirlərlə robot döyüşlərini texnologiya nümayişindən canlı əyləncə formatına çevirməyi hədəfləyir.