Ukraynada keşiş 3 nəfəri güllələyərək öldürdü

Ukraynanın Zakarpatye vilayətinin Vışkovo qəsəbəsində silahlı insident baş verib, 3 nəfər həyatını itirib.

hadiseler.info xəbər verir ki, bu barədə Ukrayna Milli Polisi məlumat yayıb.

Məlumata əsasən, əvvəllər keşiş kimi xidmət etmiş 45 yaşlı şəxs yerli sakinin həyətinə daxil olaraq ev sahibinə və onun həyat yoldaşına tapançadan bir neçə dəfə atəş açıb. O, daha sonra küçəyə çıxaraq yoldan keçən mülki şəxslərə də ateş açmağa başlayıb.

Qanlı atışma nəticəsində 3 nəfər həlak olub, 2 nəfər isə müxtəlif dərəcəli bədən xəsarətləri alıb.

Polis əməkdaşlarının keçirdiyi xüsusi əməliyyat nəticəsində şübhəli şəxs saxlanılaraq tərksilah edilib. Hadisənin ehtimal olunan motivləri arasında məişət münaqişəsi və xuliqanlıq versiyaları araşdırılır.

Saxlanılan şəxsin evində və xidmət etdiyi kilsənin ərazisində aparılan axtarışlar zamanı qeydiyyatsız ov tüfəngi, tapança, çoxlu sayda patron və narkotik vasitə (çətənə) olduğu ehtimal edilən maddə aşkarlanaraq götürülüb.