Universitetlərə elektron qeydiyyat başlayır – Abituriyentlərin NƏZƏRİNƏ

Bakalavriat səviyyəsi üzrə ali təhsil müəssisələrinə qəbul olanlar üçün qeydiyyat prosesinə start verilir.

hadiseler.info xəbər verir ki, İnnovasiya və Rəqəmsal İnkişaf Agentliyinin (İRİA) məlumatına əsasən, abituriyentlər qeydiyyatlarını yalnız my.gov.az portalı vasitəsilə həyata keçirəcəklər.

Qeydiyyat prosesinin təfərrüatları:

 Müddət: Qeydiyyat 28 avqust saat 11:00-dan 8 sentyabr saat 18:00-a kimi davam edəcək. Qeyd olunan vaxtadək qeydiyyatdan keçməyən və təhsil müəssisəsindən təsdiq almayan şəxslər qəbul olunanların siyahısından xaric ediləcəklər.

 Müraciət qaydası: Abituriyentlər “mygov ID” vasitəsilə my.gov.az platformasındakı şəxsi kabinetlərinə daxil olmalı, “Xidmətlər” bölməsinin “Qurumlar” hissəsindən Elm və Təhsil Nazirliyini seçərək “Ali və orta ixtisas təhsil müəssisələrinə təhsilalanların qeydiyyatı” xidmətinə keçməlidirlər.

 Məlumat və sənədləşmə: Şəxsi və qəbul məlumatları yoxlanıldıqdan sonra sistemdə çatışmayan sənədlər elektron şəkildə yüklənməlidir. “Güzəştli qəbul” bölməsində təhsil tələbə krediti və ya sosial həssas guruh statusu seçilərək müvafiq təsdiqedici sənədlər əlavə olunur.

 Ödəniş və təsdiq: Müraciət statusu “Xidmətin tarixçəsi” bölməsindən izlənilir. “Ödəniş edilməlidir” statusu yarandıqda təhsil haqqı onlayn ödənilə və ya ödəniş qəbzi sistemə yüklənə bilər. Təhsil müəssisəsinin təsdiqindən sonra qeydiyyat tamamlanır və bildiriş “mygov” platformasına göndərilir.