ÜST rəhbərindən dəhşətli xəbərdarlıq

Ümumdünya Səhiyyə Təşkilatının (ÜST) baş direktoru Tedros Adhanom Qebreyesus yeni tənəffüs yolları patogeninin COVID-19-a bənzər genişmiqyaslı yeni pandemiyaya yol aça biləcəyi barədə xəbərdarlıq edib.

hadiseler.info xəbər verir ki, ÜST rəhbəri bu barədə BMT Baş Assambleyasının Nyu-Yorkda keçirilən sessiyası çərçivəsində təşkil olunan mətbuat konfransında bildirib.

Qebreyesus növbəti pandemiyanın baş verməsinin qaçılmaz olduğunu vurğulayaraq deyib:

“Gecələr yuxumu əlimdən alan əsas narahatlıqlardan biri yeni tənəffüs patogeninin ortaya çıxma ehtimalıdır. Bu xəstəlik COVID-19-un yaratdığı ağır fəsadlarla eyni nəticələrə gətirib çıxara bilər”.

Xəstəliklərin sürətlə yayılma riskinə misal olaraq Konqo Demokratik Respublikasında davam edən Ebola epidemiyasını göstərən ÜST rəhbəri, infeksiyanın dünyanın istənilən nöqtəsində baş qaldıra biləcəyini və bunun bütün bəşəriyyət üçün ciddi təhdid yaratdığını diqqətə çatdırıb.