8 avtobus marşrutunun xətti dəyişdirildi

Xırdalan şəhərinin Heydər Əliyev prospektində aparılan təmir-tikinti işləri səbəbindən nəqliyyatın hərəkəti məhdudlaşdırılıb və avtobus marşrutlarında dəyişiklik edilib.

hadiseler.info Azərbaycan Yerüstü Nəqliyyat Agentliyinə (AYNA) istinadən xəbər verir ki, tətbiq olunan məhdudiyyətlə əlaqədar E2, 135, 515, 517, 523, 535, 592 və 596 nömrəli avtobusların hərəkət marşrutu müvəqqəti olaraq alternativ küçələrə yönləndirilib.

Yenilənmiş hərəkət sxeminə əsasən, E2 nömrəli marşrut “20 Yanvar” metrostansiyasından Xırdalan istiqamətində Heydər Əliyev prospekti, Zərifə Əliyeva, Qalubiyyə və Mehdi Hüseynzadə küçələri ilə hərəkət edəcək. 135 nömrəli marşrutun başlanğıc məntəqəsi Mehdi Hüseynzadə küçəsi təyin olunub. 517 nömrəli marşrut iki istiqamət üzrə (“Yeni Bakı” – Həsən Əliyev küçəsi və “Yeni Bakı” – Heydər Əliyev prospekti) fəaliyyət göstərəcək.

515, 523 və 596 nömrəli marşrutlar Heydər Əliyev prospekti, Hacı Zeynalabdin Tağıyev, Osman Sarıvəlli, İmadəddin Nəsimi və Həsən Əliyev küçələrindən keçəcək. 535 nömrəli avtobusun son dayanacağı Heydər Əliyev prospektində H.Z.Tağıyev küçəsi ilə kəsişmənin yaxınlığında, 592 nömrəli marşrutun başlanğıc dayanacağı isə M.Hüseynzadə küçəsi ilə kəsişmədə təşkil olunub.