“Yay Fest 2026”: Şamaxıda “Elm, Etika və Gələcək” düşərgəsi baş tutdu

Süni intellekt və rəqəmsallaşmaya həsr olunan “Yay Fest 2026” çərçivəsində sayca beşinci “Elm, Etika və Gələcək” düşərgəsi təşkil edilib.

hadiseler.info xəbər verir ki, Gənclər Fondunun dəstəyi və tərəfdaş təşkilatların birgə təşkilatçılığı ilə keçirilən düşərgənin əsas məqsədi gənclərin rəqəmsal texnologiyalar barədə maariflənməsini təmin etmək və gələcəyin əmək bazarına uyğun bacarıqlar formalaşdırmaqdır.

5 günlük proqram çərçivəsində gənclər süni intellektin təhsil və karyeradakı rolunu müzakirə edib, “Yüksəliş masası” və xaricdə təhsil mövzusunda panel görüşlərdə iştirak ediblər. Həmçinin gənclər Milli Məclisin deputatı Fariz İsmayılzadə və tarix elmləri doktoru Həsən Həsənovla maraqlı görüşlər keçiriblər.

Təlimlərlə yanaşı, iştirakçılar üçün yoqa, zumba, Şamaxı Astrofizika Rəsədxanasına ekskursiya, idman yarışları və musiqili proqramlar təşkil olunub.

Qeyd edək ki, sentyabrın 4-dək davam edəcək “Yay Fest 2026” çərçivəsində ümumilikdə 8 fərqli düşərgənin təşkili və 2 mindən çox gəncin iştirakı nəzərdə tutulub.