Yeni Klinikada Tibbi Tədris-Simulyasiya Mərkəzi fəaliyyətə başlayıb

TƏBİB-in tabeliyində fəaliyyət göstərən Yeni Klinikada Tibbi Tədris-Simulyasiya Mərkəzinin açılışı olub.

“Report”un məlumatına görə, BP və onun tərəfdaş şirkətlərinin maliyyə dəstəyi, “Sağlamlığa Xidmət” İctimai Birliyinin icrası ilə yaradılan mərkəz tibb işçilərinin və tələbələrin peşəkar hazırlığının gücləndirilməsi məqsədi daşıyır. Layihə davamlı tibbi təhsil imkanlarının genişləndirilməsi və ölkə üzrə təlimlərə bərabər çıxışın təmin edilməsini hədəfləyir.

Beynəlxalq standartlara uyğun qurulan mərkəzdə manipulyasiya, travma, xəstəyə qulluq və pediatrik təcili yardım otaqları fəaliyyət göstərir. Tədris bazası yüksək realizm səviyyəsinə malik simulyasiya avadanlıqları və real klinik mühiti əks etdirən müasir texnologiyalarla təchiz edilib.

Açılış mərasimində çıxış edən TƏBİB-in icraçı direktorunun müavini Bahadur Rzayev bildirib ki, simulyasiya əsaslı təlimlər tibb işçilərinin praktiki bacarıqlarının beynəlxalq standartlara uyğun inkişafına və ölkədə tibbi xidmətlərin keyfiyyətinin yüksəldilməsinə mühüm töhfə verəcək.

BP-nin Xəzər regionu üzrə vitse-prezidenti Bəxtiyar Aslanbəyli isə layihənin məqsədinin tibb mütəxəssislərinin müasir təlim imkanlarına çıxışını genişləndirmək və onların peşəkar bacarıqlarını artırmaq olduğunu vurğulayıb.

Mərasimin ardından qonaqlar mərkəzlə tanış olub, təcili tibbi yardım üzrə praktik simulyasiya nümayişini izləyiblər. Təqdimat zamanı müxtəlif klinik vəziyyətlərdə tibbi komandanın fəaliyyəti və qərarvermə prosesi nümayiş etdirilib.

Mərkəzdə həmçinin müasir simulyasiya avadanlıqları, onlayn təlimlərin idarə olunması və videoarxiv sistemləri, real vaxt rejimində yayım üçün audio-vizual infrastruktur, eləcə də tam təchiz olunmuş təlim otaqları yaradılıb.

Qeyd edək ki, layihənin ilk mərhələsində təcili tibbi yardım modulu istifadəyə verilib. Növbəti mərhələlərdə isə reanimasiya və intensiv terapiya, neonatologiya, həmçinin doğuş üzrə əlavə təlim modullarının yaradılması nəzərdə tutulur.