Zakir Həsənov hərbi hissələrdə oldu-FOTOLAR

Azərbaycan Respublikası Müdafiə Nazirliyinin (MN) rəhbər heyəti Əlahiddə Ümumqoşun Ordunun (ƏÜO) hərbi hissələrinə baş çəkib. Səfər çərçivəsində xidməti-döyüş fəaliyyətinin təşkili və hərbi qulluqçular üçün yaradılan sosial-məişət şəraiti ilə yaxından tanışlıq olub.

hadiseler.info xəbər verir ki, bu barədə Müdafiə Nazirliyinin mətbuat xidməti məlumat yayıb.

Bildirilib ki, rəhbərlik döyüş mövqelərində xidmət aparan şəxsi heyətlə söhbətlər edib, onların qayğıları ilə maraqlanıb. Vurğulanıb ki, Prezident, Silahlı Qüvvələrin Ali Baş Komandanı İlham Əliyevin diqqət və qayğısı sayəsində hərbi hissələrdə bütün zəruri modern infrastruktur formalaşdırılıb.

Həmçinin qeyd olunub ki, döyüş mövqelərində artilleriya zərbələri və pilotsuz uçuş aparatlarının (PUA) təhdidlərinə qarşı dayanıqlı olan müasir mühəndis-fortifikasiya qurğuları inşa edilib.

Təlim poliqonunda olan nazirliyin rəhbərliyinə bölmələrin təlim və məşqlərinin real döyüş şəraitinə uyğun keçirilməsi üçün yaradılan şərait barədə məlumat verilib.

Sonda müdafiə naziri general-polkovnik Zakir Həsənov şəxsi heyətin sosial-məişət şəraitinin daha da yaxşılaşdırılması, döyüş hazırlığının intensivləşdirilməsi, eləcə də müasir silah və texnikaların səmərəli tətbiqi ilə bağlı məsul şəxslərə müvafiq tapşırıqlar verib.