327 gün dənizdə təkbaşına: Britaniyalı səyyah iki okeanı keçərək rekord qırdı

Britaniyalı səyyah Deyv Bell Sakit və Hind okeanlarını təkbaşına və fasiləsiz avar çəkərək qət edib.

hadiseler.info “TASS”a istinadən xəbər verir ki, 54 yaşlı keçmiş hərbi dəniz piyadası 327 gün 16 saat ərzində 15 500 dəniz mili məsafə qət edərək böyük uğura imza atıb. Səyahətinə 2025-ci il noyabrın 9-da Perudan başlayan Bell, 2026-cı il oktyabrın 2-də Keniyanın Kilifi şəhəri yaxınlığında sahilə çatıb.

Səfərini “Billy No Mates” adlı 8.3 metrlik karbon lifli qayıqla həyata keçirən səyyah, rekord qaydalarına əsasən quruya çıxmayıb və heç bir kənar fiziki yardım almayıb. Hər gün 12 saat avar çəkən Bell naviqasiya, yemək hazırlanması və təmir işlərini həyata keçirib.

Səyyah bu tarixi cəhdi ilə yanaşı, hərbçilər, veteranlar və təcili yardım əməkdaşlarına dəstək göstərən xeyriyyə təşkilatı üçün 112 min funt sterlinqdən çox ianə toplayıb.