Moskvadan Kiyevdəki xarici diplomatlara növbəti xəbərdarlıq

Rusiya Xarici İşlər Nazirliyi diplomatik missiyaların əməkdaşları da daxil olmaqla, xarici vətəndaşlara Kiyevdə və Ukraynanın hərbi təyinatlı obyektlərinin yaxınlığında olmamaq barədə xəbərdarlıq edib.

hadiseler.info xəbər verir ki, bu barədə bəyanat Rusiya XİN-in mətbuat xidməti tərəfindən yayılıb.

Nazirlik 2026-cı ilin may ayında Kiyevi tərk etmək barədə verdiyi tövsiyələri və Qərb ölkələrinin öz vətəndaşlarına Ukraynaya səfər etməmək çağırışlarını xatırladıb. Məlumatda bəzi şəxslərin bu xəbərdarlıqlara əməl etməyərək həyatlarını təhlükəyə atdıqları bildirilib.

Rəsmi Moskva Rusiya Silahlı Qüvvələrinin kütləvi qisas zərbələri endirməyə davam edəcəyini vurğulayaraq, xəbərdarlıqları nəzərə almayanların mənfi nəticələrə görə məsuliyyət daşıyacağını bəyan edib.

Xatırladaq ki, mayın 25-də Rusiya XİN Ukraynanın PUA istehsalı obyektlərinə və Kiyevdəki idarəetmə mərkəzlərinə zərbə endirəcəyini elan edərək diplomatları təxliyəyə çağırmışdı, lakin Aİ bu tələbi rədd etmişdi.