Bu gün Azərbaycanın Müstəqilliyin Bərpası Günüdür

Bu gün – 18 oktyabr tarixində Azərbaycan Respublikasının dövlət müstəqilliyinin bərpa edilməsindən 35 il ötür.

hadiseler.info xəbər verir ki, 1991-ci il oktyabrın 18-də Ali Sovet “Azərbaycan Respublikasının dövlət müstəqilliyi haqqında” Konstitusiya Aktını qəbul edib.

Sənəddə 1918-ci il 28 may tarixli İstiqlal Bəyannaməsinə və “Azərbaycan Respublikasının dövlət müstəqilliyini bərpa etmək haqqında” Ali Sovetin 1991-ci il 30 avqust tarixli bəyannaməsinə istinad olunub. Bununla da Azərbaycan Respublikasının Azərbaycan Xalq Cümhuriyyətinin (AXC) hüquqi varisi olduğu rəsmən təsbit edilib.

Müstəqilliyin bərpasından sonra, 1992-ci ilin mayında Milli Məclis tərəfindən Azərbaycan Respublikasının Dövlət Himni (musiqisi Üzeyir Hacıbəyovun, sözləri Əhməd Cavadın), az sonra isə üçrəngli bayraq və alov təsvirli səkkizguşəli ulduzlu dövlət gerbi təsdiqlənib.

Azərbaycan parlamentinin 15 oktyabr 2021-ci il tarixli plenar iclasında “Müstəqillik Günü haqqında” yeni qanun qəbul edilib və həmin gün Prezident İlham Əliyev tərəfindən təsdiqlənib. Qanuna əsasən, 18 Oktyabr – Dövlət Müstəqilliyi Gününün adı dəyişdirilərək Müstəqilliyin Bərpası Günü elan olunub.

Qeyd edək ki, Müstəqilliyin Bərpası Günü hər il ölkəmizdə rəsmi bayram kimi qeyd edilən iş günüdür.