Azərbaycan və Özbəkistan əbədi dostluq haqqında müqavilə imzalayacaq

Azərbaycan Respublikasının Prezidenti İlham Əliyevin Özbəkistana dövlət səfəri Bakı ilə Daşkənd arasında müttəfiqlik münasibətlərinin keyfiyyətcə yeni mərhələyə keçməsini təmin edir. Ortada olan tarixi, dini və mədəni bağlar son illərdə güclü siyasi dialoqla daha da möhkəmlənib.

hadiseler.info xəbər verir ki, səfər çərçivəsində iki ölkə arasında Ali Dövlətlərarası Şuranın üçüncü iclası keçiriləcək və strateji əhəmiyyət daşıyan “Azərbaycan Respublikası ilə Özbəkistan Respublikası arasında əbədi dostluq haqqında Müqavilə” imzalanacaq.

Son illərdə Azərbaycan Mərkəzi Asiya ölkələri ilə çoxtərəfli əməkdaşlığı genişləndirərək əvvəllər “C5” kimi tanınan regional formata qoşulub və onu “C6” səviyyəsinə yüksəldib. Paralel olaraq, TDT, BMT və Qoşulmama Hərəkatı platformalarında da hər iki dövlət vahid mövqedən çıxış edir.

İqtisadi sahədə ticarət dövriyyəsi 2025-ci ildə 795 milyon dollara çatıb, tranzit daşımaları isə 1,4 milyon ton təşkil edib. Füzulidə Mirzə Uluqbəy adına məktəbin tikintisi, 100 hektarlıq “Dostluq bağı” və Bakıda “Özbəkistan” parkının salınması iki ölkə arasında humanitar əlaqələrin sarsılmaz göstəricisidir.