Özbəkistanda nəhəng şəhərsalma layihəsi: “Yeni Daşkənd”

Özbəkistanın paytaxtı Daşkənd şəhərinin şərqində, Yuxori Çirchiq və Orta Çirchiq rayonları ərazisində “Yeni Daşkənd” (Yangi Toshkent) adlı iri şəhərsalma layihəsi icra olunur. Layihənin təməli 2023-cü il martın 18-də qoyulub.

hadiseler.info xəbər verir ki, ümumi ərazisi 19 720 hektar olan şəhərin gələcəkdə 2 milyon nəfər əhali üçün nəzərdə tutulması planlaşdırılır. Birinci mərhələdə 6 000 hektar sahədə 600 min sakin üçün müasir yaşayış və infrastruktur şəraiti yaradılacaq. Layihə çərçivəsində 30 məktəb, 20 uşaq bağçası, çoxprofilli xəstəxana və ailə poliklinikaları tikiləcək. Şəhərin 420 hektarlıq mərkəzi parkında 200 min ağac əkiləcək, eləcə də 100 min avtomobillik yeraltı dayanacaq, 14 tunel və 7 körpü inşa olunacaq.  

“Ağıllı və yaşıl şəhər” konsepsiyası ilə qurulan “Yeni Daşkənd”də suya qənaət edən texnologiyalar sayəsində su sərfi iki dəfə azaldılacaq. Şəhərin mühüm obyektlərindən biri 55 min tamaşaçı tutumlu müasir futbol stadionudur. 2025-ci ilin noyabrında təməli qoyulan və 2026-cı ilin ortalarına doğru tikintisi sürətlə davam edən stadionun 2027-ci ildə keçiriləcək U-20 dünya çempionatında istifadə olunması nəzərdə tutulur.  

Bununla yanaşı, Yeni Daşkənd Beynəlxalq Hava Limanının inşası və Nizami Gəncəvi adına Özbəkistan Milli Pedaqoji Universitetinin 20 min tələbəlik yeni kampusunun tikintisi də davam etdirilir. Bütövlükdə mərhələli şəkildə formalaşdırılacaq şəhərin ana inkişaf planında əsas hədəf il kimi 2045-ci il müəyyən olunub.