Ermənistanın keçmiş nəqliyyat və rabitə nazirinin həbs müddəti UZADILDI

Ermənistanın keçmiş nəqliyyat və rabitə naziri, İrəvanın eks-meri Qaqik Beqlaryanın barəsində seçilmiş həbs qətimkan tədbirinin müddəti daha iki ay uzadılıb.

hadiseler.info xəbər verir ki, “Armenpress”in yaydığı məlumata görə, sabiq məmur iyunun 5-dən bəri həbsdə saxlanılır.

Eks-nazir vəzifə səlahiyyətlərindən sui-istifadə etməkdə və xüsusilə külli miqdarda çirkli pulların yuyulmasında təqsirləndirilir.

Ermənistan Korrupsiyaya Qarşı Mübarizə Komitəsinin məlumatına əsasən, Qaqik Beqlaryan 2004–2010-cu illərdə İrəvanın Kentron icmasının rəhbəri və şəhər meri vəzifələrində çalışarkən səlahiyyətlərini aşaraq ümumi dəyəri 2 milyard 327 milyon dram (təxminən 11 milyon AZN) olan 27 daşınmaz əmlakı qanunsuz olaraq özünün və ya yaxın şəxslərinin mülkiyyətinə keçirməkdə, daha sonra isə həmin əmlakları leqallaşdırmaqda ittiham olunur.