ABŞ-də sinif yoldaşını qətlə yetirən qadının edamı son anda təxirə salındı

1995-ci ildə sinif yoldaşını qətlə yetirdiyinə görə ölüm cəzasına məhkum edilmiş Krista Paykın edam hökmünün icrası ABŞ Federal Apellyasiya Məhkəməsi tərəfindən müvəqqəti dayandırılıb.

hadiseler.info “The New York Times” qəzetinə istinadən xəbər verir ki, hökm icra olunsaydı, Payk Tennessi ştatında son 200 ildən artıq müddətdə edam edilən ilk qadın olacaqdı. Hökmün icrasına bir neçə saat qalmış ABŞ-nin 6-cı Dairə üzrə Apellyasiya Məhkəməsinin hakimi Ceyn B.Stranç tərəflərin arqumentlərinin araşdırılması üçün qısa fasilə verilməsi barədə qərar qəbul edib.

Müdafiə tərəfi 18 yaşında cinayət törədən Paykın uşaqlıqda məruz qaldığı zorakılıqların, həmçinin ona sonradan qoyulmuş bipolyar pozuntu və travma sonrası stress pozuntusu diaqnozlarının nəzərə alınmadığını bildirir. Apellyasiya Məhkəməsinin üç hakimdən ibarət kollegiyası bu arqumentlərə baxmaq üçün əlavə vaxt ayırıb.

Qeyd edək ki, 1995-ci ildə Payk rəfiqəsi və sevgilisi ilə birlikdə 19 yaşlı sinif yoldaşı Kollin Slemmerə işgəncə verərək onu qətlə yetirib. O, bu iş üzrə ölüm cəzasına məhkum edilən yeganə şəxsdir; digər iki şərikinə isə ölüm cəzası verilməyib. Payk cinayətdə iştirakını inkar etmir, lakin müdafiəçiləri cəzanın dəyişdirilməsini tələb edirlər.