Azərbaycan Media və Yayım Şurasından XƏBƏRDARLIQ

Türkiyənin sosial media seqmentində Azərbaycan Respublikası Prezidentinin adından həqiqətə uyğun olmayan, saxta fikirlərin yayıldığı müşahidə olunur.

hadiseler.info xəbər verir ki, bu barədə Azərbaycan Media və Yayım Şurasının açıqlamasında bildirilib. Qeyd olunub ki, dövlət başçısının səsləndirmədiyi ifadələrin ona aid edilməsi və rəsmi mövqe kimi təqdim olunması ictimaiyyəti yanıltmağa xidmət edən kobud dezinformasiya nümunəsidir.

Şura xatırladıb ki, Azərbaycan Respublikası Prezidentinin çıxışları, bəyanatları və fəaliyyəti barədə məlumatların ilkin və rəsmi mənbəyi məhz dövlət başçısının rəsmi internet informasiya ehtiyatı və rəsmi sosial şəbəkə hesablarıdır. Bu mövzuda məlumatlar hazırlanarkən digər resurslardakı ifadələr rəsmi mənbələrdən təsdiqlənmədən dövlət başçısına aid edilməməlidir.

Açıqlamada media subyektləri və sosial şəbəkə istifadəçiləri məlumatların dəqiqliyinə məsuliyyətlə yanaşmağa, paylaşmazdan əvvəl rəsmi mənbələrlə dəqiqləşdirməyə və dezinformasiyanın yayılmasına yol verməməyə çağırılıb.