Azərbaycanlı futbolçu özünə xəsarət yetirdi:Əməliyyat olundu

“Sumqayıt”ın kapitanı Səbuhi Abdullazadə özünə ciddi xəsarət yetirib.

hadiseler.info xəbər verir ki, Misli Premyer Liqasının birinci turunda “Neftçi” ilə matçda qırmızı vərəqə alan yarımmüdafiəçi əsəbini stadionun qapısından çıxarmaq istəyib.

24 yaşlı oyunçu qapıya yumruq vurub. Nəticədə qapıdan qopan şüşələr onun ayağına düşüb və futbolçu ağır zədə alıb.

Klubun mətbuat xidmətinin rəhbəri Zaur Xudiyev futbolçunun vəziyyəti ilə bağlı açıqlama verərək zədənin ciddi olduğunu, lakin karyerası üçün təhlükə yaradacaq bir halın olmadığını bildirib.

Səbuhi Abdullazadə Bakıdakı özəl xəstəxanaların birində uğurla əməliyyat olunub. Klubun yaydığı son məlumata görə, əməliyyat uğurla başa çatıb və futbolçu təxminən 5 ay sonra yaşıl meydanlara dönə biləcək.

Qeyd edək ki, Səbuhi Abdullazadə “Neftçi” ilə matçın 74-cü dəqiqəsində rəqib oyunçu Breno Almeydaya qarşı etdiyi hərəkətə görə meydandan qovulub. Qarşılaşma “Sumqayıt”ın 1:3 hesablı məğlubiyyəti ilə yekunlaşıb.