Bakıda BMT-nin İqlim Həftəsində 140-dan çox ölkədən 2700 nümayəndə iştirak edib

Sentyabrın 7-dən 11-dək Bakı Konqres Mərkəzində Azərbaycanın ev sahibliyi ilə BMT-nin İqlim Dəyişmələri üzrə Çərçivə Konvensiyasının (UNFCCC) dördüncü İqlim Həftəsi və Bakı İqlim Fəaliyyəti Həftəsi keçirilib.  

hadiseler.info “Oxu.Az”a istinadən xəbər verir ki, Xarici İşlər Nazirliyinin (XİN) yaydığı məlumata əsasən, həftə çərçivəsində ümumilikdə 68 tədbir təşkil olunub və 140-dan çox ölkədən 2700-dək nümayəndə qeydiyyatdan keçib.

Tədbirlərdə dövlət nümayəndə heyətləri, beynəlxalq və qeyri-hökumət təşkilatları, özəl sektor və akademik dairələrin təmsilçiləri iştirak ediblər. Proqram çərçivəsində 8 mandatlı iclas, UNFCCC-nin İcra Forumunun sessiyaları və Azərbaycan tərəfindən 37 aktual tədbir təşkil olunub. Həmçinin COP29, COP30 və COP31 sədrliyini həyata keçirən Azərbaycan, Braziliya, Türkiyə və Avstraliyanın iştirakı ilə “Belem Missiyası 1.5” Troykası çərçivəsində məsləhətləşmələr aparılıb. Qeyd edək ki, 2026-cı ilin ilk UNFCCC İqlim Həftəsi apreldə Koreya Respublikasında baş tutmuşdu.