Bakıda güclü külək səbəbindən 2 qadın xəsarət aldı

Ötən gün ölkə ərazisində müşahidə olunan küləkli hava şəraiti nəticəsində iki nəfər xəsarət alıb.

hadiseler.info xəbər verir ki, bu barədə Səhiyyə Nazirliyi rəsmi məlumat yayıb.

Qeyd olunub ki, saat 20:20-də 1952-ci il təvəllüdlü qadın güclü küləyin təsirindən yıxılaraq xəsarət alıb. Tibbi müayinə zamanı ona sağ pəncənin IV daraq sümüyünün sınığı diaqnozu qoyulub.

Daha sonra, saat 20:40-da 1987-ci il təvəllüdlü başqa bir qadın küləyin qapını çırpması nəticəsində sol əlin 3-4-cü barmaqlarının kəsilmiş yarası diaqnozu ilə tibbi yardım alıb.

Səhiyyə Nazirliyindən bildirilib ki, hər iki zərərçəkənə müvafiq tibbi yardım göstərildikdən və vəziyyətləri qənaətbəxş qiymətləndirildikdən sonra onlar ambulator müalicə üçün evə buraxılıblar.