Baş Qərargah rəisi Netanyahunun İranla bağlı əmrindən imtina etdi

İsrail Müdafiə Ordusunun (TSAŞ) Baş Qərargah rəisi, general-leytenant Eyal Zamirin ölkə rəhbərliyinin İrana qarşı hərbi əməliyyat keçirilməsi ilə bağlı verdiyi göstərişi yerinə yetirməkdən imtina etdiyi bildirilir.

hadiseler.info xəbər verir ki, bu barədə İsrailin “Channel 12” telekanalı məlumat yayıb. Qərara səbəb kimi sözügedən əməliyyatın Tehranla birbaşa hərbi münaqişəni yenidən alovlandıra biləcəyi narahatlığı göstərilib.

Məlumata görə, Eyal Zamir əlavə müzakirələrin aparılmasını tələb edib və Baş nazir Benyamin Netanyahu başda olmaqla siyasi rəhbərlik tərəfindən hüquqi əsasları təsdiqləyən imzalı sənəd təqdim olunmayacağı təqdirdə əmri icra etməyəcəyini bildirib. Hərbi dairələrdə bu cür addımların ölkədə keçiriləcək seçkiqabağı dövrdə siyasi məqsədlərlə (piar üçün) istifadə oluna biləcəyindən ehtiyat edildiyi qeyd olunub.

Xatırladaq ki, son günlərdə İsrail və ABŞ rəsmilərinin İrana qarşı yeni zərbələr endirilməsi imkanlarını müzakirə etdiyinə dair xəbərlər yayılmışdı.