DTX adından dələduzluq: Süni intellektlə sənət adamının pulunu ələ keçirdilər- VİDEO

Son dövrlərdə xaricdə fəaliyyət göstərən mütəşəkkil kibercinayətkar şəbəkələr süni intellekt texnologiyalarından istifadə etməklə yeni və təkmilləşdirilmiş kiberhücumları davam etdirirlər.

hadiseler.info xəbər verir ki, Dövlət Təhlükəsizliyi Xidmətinin Mətbuat xidməti məsələ ilə bağlı xəbərdarlıq məlumatı yayıb.

Aparılan təhlillər göstərir ki, müvafiq qruplaşmalar süni intellekt alqoritmləri və xüsusi proqram təminatlarından istifadə edərək dövlət qulluqçularını, müxtəlif müəssisə əməkdaşlarını və sadə vətəndaşları hədəfə alırlar. Çoxsaylı maarifləndirici xəbərdarlıqlara baxmayaraq, bəzi hallarda vətəndaşlar hələ də bu tür dələduzluqların qurbanına çevrilirlər.

Kibercinayətkarlar xüsusi ssenarilər əsasında hədəf seçdikləri şəxslərə təcili və vacib xarakterli mesajlar göndərir, daha sonra onları hüquq-mühafizə orqanlarının və ya digər rəsmi qurumların adından istifadə edən saxta hesablara yönəldirlər. Həmin şəxslərdən xarici hesablara pul köçürmələri etmək və ya qanunsuz tapşırıqları yerinə yetirmək tələb olunur.

Dələduzların qurbanı olmuş sənət adamlarından biri yaşadığı hadisəni belə təsvir edib:

“Adımı, iş yerimi hamısını düzgün dedi. Mən də düşündüm ki, deməli doğrudan tanıyır. Dedi ki, mənim hesabımdan digər ölkədə fəaliyyət göstərən terror təşkilatının hesabına köçürmələr aşkar olunub və bununla bağlı cinayət işi açılıb. Sonra əlavə etdi ki, bu məsələ məxfidir və nə ailəmə, nə iş yoldaşlarıma, nə də başqa heç kimə bu barədə məlumat verməməliyəm. Hətdə hesabın bağlanmalı olduğunu da dedi.”
Zərərçəkmiş şəxs həbs olunacağı ilə hədələndiyi üçün qorxudan deyilən hesaba pul köçürdüyünü bildirib:
“Əvvəlcə çox panikaya düşdüm. Daha sonra sakitləşdim və yoldaşımla danışdım. O da işdə idi və mənə dedi ki, dövlət qurumu pul köçürülməsi etməz. Elə həmin an sanki bir aydınlanma gəldi.”
DTX rəqəmsal mühitdə son dərəcə diqqətli və ayıq-sayıq olmağın vacibliyini xatırladır. Şübhəli müraciət, tələb və ya mesajla karşılaşdıqda dərhal hüquq-mühafizə orqanlarına məlumat verilməsi xahiş olunur.