FHN silsilə maarifləndirmə tədbirləri keçirdi

Fövqəladə Hallar Nazirliyinin (FHN) aidiyyəti qurumları tərəfindən fövqəladə hallarla bağlı davranış qaydaları barədə əhalinin maarifləndirilməsi məqsədilə ölkə dərəcəsində silsilə tədbirlər təşkil olunub.

Fövqəladə Hallar Nazirliyinin verdiyi məlumata görə, Dövlət Yanğın Nəzarəti, Kiçikhəcmli Gəmilərə Nəzarət və Sularda Xilasetmə Dövlət xidmətlərinin mütəxəssisləri Bakı, Gəncə, Sumqayıt, Şimal, Aran və Şimal-Qərb regional mərkəzləri üzrə tibb müəssisələrində, uşaq bağçalarında, gənclər və idman idarələrində, eləcə də yerli inzibati ərazi nümayəndəliklərində görüşlər keçiriblər.

Tədbirlərin əsas məqsədi baş verə biləcək təbii və texnogen xarakterli fövqəladə hadisələr zamanı zəruri davranış qaydaları barədə vətəndaşlara müvafiq biliklərin aşılanmasıdır.

Görüşlər zamanı yanğın və zəlzələ riski, FHN-in “112” qaynar telefon xəttinin təyinatı izah olunub, ilkin yanğınsöndürmə vasitələrindən istifadə qaydaları əyani şəkildə nümayiş etdirilib. İnteraktiv formatda keçirilən tədbirlərdə iştirakçıların sualları ətraflı cavablandırılıb.