“Green Card” qeydiyyatı yenidən başlayır – Məhkəmədən mühüm QƏRAR

ABŞ Dövlət Departamenti müvəqqəti dayandırılmış “Green Card” (DV-2027) lotereya proqramına qeydiyyat prosesini ən geci oktyabrın 18-də yenidən başlatmalıdır.

hadiseler.info xəbər verir ki, bu barədə müvafiq qərarı Kaliforniya ştatının cənub dairəsi üzrə məhkəməsi çıxarıb.

Məhkəmənin qərarında deyilir: “Məhkəmə ABŞ dövlət katibi Marko Rubionun üzərinə 2027-ci maliyyə ili üzrə immiqrant viza proqramına qeydiyyatı ABŞ-nin Şərq sahili vaxtı ilə oktyabrın 18-dək başlatmaq öhdəliyi qoyur. Qeydiyyat dövrü 30 gün davam etməlidir”. Qərara əsasən, Dövlət Departamenti rəsmi saytında qeydiyyatın başlama tarixi haqqında elan yerləşdirməlidir.

Xatırladaq ki, 2025-ci ilin dekabrında Braun Universitetində törədilən atışmadan sonra Ağ Ev “Green Card” proqramını müvəqqəti dayandırmışdı. Atışmanı törədən şəxsin ölkəyə məhz bu viza vasitəsilə daxil olduğu bildirilirdi.

“Green Card” (United States Permanent Resident Card) ABŞ vətəndaşı olmayan şəxslərə ölkədə daimi yaşamaq və işləmək hüququ verən rəsmi sənəddir. ABŞ hökuməti hər il lotereya vasitəsilə 55 minə qədər viza ayırır.