II Qareginin məhkəmə prosesi təxirə düşüb

Bütün ermənilərin katalikosu II Qaregin və daha 6 yepiskopun cinayət işinə baxan hakim Hakob Manukyan özü-özünə etiraz edərək məhkəmə prosesindən kənarlaşıb. Hadisələr.info xəbər verir ki, bu barədə vəkil Ara Zohrabyan jurnalistlərə açıqlamasında bildirib.

Vəkilin sözlərinə görə, məhkəmənin ilkin baxış iclasında hakimin kənarlaşdırılması məsələsi müzakirə edilib və Hakob Manukyan işə baxmaqdan imtina edib. Məhkəmə prosesinin təxirə salınmasından sonra cinayət işi araşdırılması üçün başqa hakimə həvalə olunacaq.

Çünki hakim özünü kənarlaşdırmasına əsas kimi vaxtilə vəkillik lisenziyasını həmin dövrdə Vəkillər Kollegiyasının sədri olmuş Ara Zohrabyandan almasını göstərib. Həmçinin A. Zohrabyan hakimin tərəfsizliyə şübhə yaratmamaq adına bu addımı atdığını əlavə edib.

Katalikos nə ilə təqsirləndirilir?

İttiham aktına əsasən, II Qaregin Ali Dini Şuranın sədri kimi xidməti səlahiyyətlərindən istifadə edərək qanuni qüvvəyə minmiş məhkəmə aktının icrasına mane olmaqda günahlandırılır.

Lakin cinayət işinin kökündə II Qareginin Masisatsotn yeparxiyasının keçmiş rəhbəri Arman Saroyanı dini rütbəsindən və vəzifəsindən məhrum etməsi dayanır. Məhkəmə A. Saroyanın bərpa olunması barədə qərar çıxarsa da, II Qaregin və 6 yepiskop bu hökmü icra etməkdən boyun qaçırıblar.

Bundan başqa, cinayət işi çərçivəsində Natan Hovhannisyan, Hovnan Hakobyan, Makar Hakobyan, Muşeq Babayan, Haykazun Nacaryan və Vahan Hovhannisyan kimi yüksək rütbəli din xadimlərinə də rəsmi ittiham irəli sürülüb.