II Qareginin məhkəməsindən QƏRAR: İclaslar açıq keçiriləcək və canlı yayımlanacaq

Ermənistanda Katolikos II Qaregin və altı yepiskopun işi üzrə məhkəmə prosesinin qapalı keçirilməsi barədə vəsatət rədd edilib.

hadiseler.info xəbər verir ki, Armavir vilayət məhkəməsinin hakimi Serj Ruşanyan məhkəmənin açıq keçirilməsi və “YouTube” vasitəsilə canlı yayımlanması barədə qərar qəbul edib. Qapalı iclas tələbini zərərçəkmiş kimi tanınan keçmiş keşiş Arman Saroyan qaldırsa da, hakim video və audioyazının aparılmasına icazə verib.

II Qaregin və digər dini xadimlər iclasa qatılmayıblar. Katolikosun vəkili Armine Fanyan məhkəməni qeyri-legitim adlandıraraq dövlətin kilsənin daxili işlərinə qanunsuz müdaxilə etdiyini bildirib.

Qeyd edək ki, II Qaregin və Ali Dini Şuranın üzvləri məhkəmə qərarının icrasına mane olmaqda ittiham edilirlər.