İlham Əliyev Almaniyanın yeni səfirinin etimadnaməsini qəbul etdi

Azərbaycan Respublikasının Prezidenti İlham Əliyev avqustun 13-də Almaniya Federativ Respublikasının ölkəmizdə yeni təyin olunmuş fövqəladə və səlahiyyətli səfiri Dirk Lölkenin etimadnaməsini qəbul edib.

hadiseler.info xəbər verir ki, dövlət başçısı səfirlə söhbət zamanı Almaniyaya səfərini xatırladıb, Prezident Frank-Valter Ştaynmayer və Kansler Fridrix Merts ilə səmərəli müzakirələr apardıqlarını diqqətə çatdırıb. Prezident “Azərbaycan Respublikası və Almaniya Federativ Respublikası arasında ikitərəfli tərəfdaşlıq üçün strateji gündəliyə dair Birgə Bəyannamə”nin münasibətləri yeni müstəviyə qaldırdığını vurğulayıb.

Səfir Dirk Lölke qəbula görə təşəkkürünü bildirərək, Azərbaycan ilə Ermənistan arasında Vaşinqton Zirvə Görüşünün ildönümü münasibətilə təbriklərini çatdırıb. İlham Əliyev isə regionda sülh gündəliyinin ölkəmizin təşəbbüsü ilə başladığını və bölgədə sülhün artıq dönməz xarakter aldığını qeyd edib.

Görüşdə Şərq-Qərb nəqliyyat dəhlizi, bərpaolunan enerji, ticarət və təhsil sahələrində əməkdaşlıq perspektivləri müzakirə olunub.